Hagskýrslugerð er hluti af EES-samningnum sem tók gildi hér á landi árið 1994. Í evrópska hagskýrslusamstarfinu er hagskýrslugerð stýrt í ríkum mæli með lagasetningu. Þetta á sér þær skýringar að lagasetning er sú leið sem talin er að best tryggi sambærilega framleiðslu hagtalna í hagskýrslusamstarfinu. Einn mikilvægasti eiginleiki opinberrar alþjóðlegrar tölfræði er sambærileiki hagtalna milli ríkja og að gæði þeirra séu áþekk. Gagnvart Íslandi gilda nær allir lagagjörningar Evrópusambandsins á sviði hagskýrslugerðar með fáum undantekningum. Eru þeir teknir upp í viðauka XXI við samninginn um Evrópska efnahagssvæðið. Alls hafa 427 hagskýrslugerðir verið innleiddar í samninginn að meðtöldum þeim gerðum sem tóku gildi við upphaf hans.
| Númer ESB-lagatexta | Nýjar EES/ESB gerðir í hagskýrslugerð árið 2016 |
|---|---|
| 2016/8 | Viðhengi við vinnumarkaðskönnun árið 2017 um sjálfstætt starfandi |
| 2016/114 | Viðhengi við tekju- og lífskjarakönnun (SILC) um heilsufar og heilbrigði barna |
| 2016/172 | Breytingar á grunnreglugerð á Evrópskum umhverfisreikningum er varðar orkuafurðir |
| 2016/335 | Tímabundnar undanþágur ákveðinna ríkja vegna Evrópska umhverfisreikninga |
| 2016/792 | Samræmd neysluverðvísitala (HICP) |
| 2016/1013 | Breytingar á grunngerð um viðskiptajöfnuð, þjónustujöfnuð og beina erlenda fjárfestingu. |
| 2016/1253 | Breytingar á gagnaskiptum tollayfirvalda og hagskýrsluframleiðenda |
| 2016/1724 | Breytingar á grunngerð tölfræði um utanríkisviðskipti vegna heimilda framkvæmdarstjórnarinnar til setningar gerða um framkvæmd og framseldra gerða er varða ákveðin atriði |
| 2016/1851 | Upptaka áætlunar um viðhengi fyrir vinnumarkaðskönnunina fyrir árin 2019,2020 og 2021 |
| 2016/1872 | Vöruflokkunarskrá ESB (prodcom). Regluleg endurskoðun |
| 2016/1952 | Evrópsk tölfræði um verð á gasi og rafmagni |
| 2016/2119 | Breytingar á grunngerðum í tölfræði um utanríkisverslun er varðar flokkun í vörulistum |
| 2016/2236 | Viðhengi við vinnumarkaðskönnunina árið 2018 um samþættingu vinnu og fjölskyldulífs |
| 2016/2304 | Skilgreining á ýmsum atriðum í gæðaskýrslum gagnaskila í þjóðhagsreikningum |
Hinn 11. júlí 2016 undirritaði forsætisráðherra nýja innleiðingareglugerð. Með því voru fyrstu 176 hagskýrslugerðirnar leiddar í Íslenskan rétt og brugðist við nauðsynlegum umbótum á innleiðingu evrópskra gerða á sviði hagskýrslugerðar. Reglugerðin verður uppfærð reglulega þar til hún nær yfir löggjöf sem hefur verið innleidd í EES-samninginn á sviði hagskýrslugerðar.